HAGKAN AKO SA AKING KAHUBARAN

Masusumpungan MO ako sa aking kahinaan
Upang paglandasin ang hagod na maalam
At isigaw sa bulong ng katahimikan
Ang malaon nang damdaming inaasam...

Isa-isang panulayin sa aking balat
Yaring hiwaga ng haplos Mong banayad
Upang aking suklian ng matamis na tugon
Katawan ko'y IYO sa nasa Mong galaw...

Hagkan ako sa aking kahubaran
At lasapin ang damdaming umiiral
Sa siwang ng kawalang-malay
Ipinadama'y tuluyang pagpapaubaya...

Ikaw at ako'y sugpungan ng pangarap
Sinisiphayong tulad ng mayabong na bulaklak
Sa bango'y walang kaparis
Kundi ang dalisay na sariwang simoy sa batis...

Saliksikin ang kaigtingan ng aking kaganapan
Ipadamang ako'y sadyang may panghalina
Sinisiil ng bawat pagdampi ng Iyong mga labi
Sa nektar ng bumubukal na pagtatangi...

Samyuin ako habang may banayad na pandama
Sa kahubara'y malaya at tunay na
nagpapaubaya
Upang maangkin Mo ang sa IYO'y pag-aari na
Sa isang halik lang puso'y nanlalamig na...