UPANG BIGYANG GINHAWA ANG MGA API

(Lucas 4:14-22a)

Ang pagbasang ating narinig ay isang hamon kung paano nga ba tayo dapat isabuhay ang pagkilala sa Diyos.

Mangyari ay nagtataka kayo bakit si Hesus ay nakapanganagaral sa Sinagoga gayong hindi naman isang pari. Ang Templo po ay matatapuan lamang sa Jerusalem kung saan ang mga Hudyo ay nagsasadya sa panahon ng pagdiriwang ng Paskwa at sama-samang nagdiriwang. Mayroon mga sinagoga sa bawat probinsya at si Hesus ay sa Nazareth, Galilea kung saan ang mga tao ay nakikinig ng aral mula sa banal na kasulatan at kung saan ang bawat isa ay maaring magparticipate na bumasa at maghayag sa araw ng pamamahinga. Kung baga po, ang Templo ay ang Parokya at ang sinagoga ay ang BEC kung saan naroon ang mga mananampalataya upang makinig ng salita ng Diyos at magnilay sa paghahayag ng isang namumuno. Ang pangyayari ay naganap matapos na si Hesus ay pumunta sa ilang ng 40 araw at tuksuhin ng demonyo upang simulan ang Kanyang misyon.

At ano po ang kanyang misyon? Ito po ay hindi lamang ang misyon ng pagiging pari, hari at propeta ngunit mas higit pa roon. Ang kanyang paghahayag mula sa sulat ni propeta Isaias ay upang bigyang katuparan ang hula ng propeta sa pagdating ng ipinangakong Mesiyas, ang magbibigay ginhawa sa mga api. Ang pagbibigay ng ginhawa sa mga api ay ang mga espesipikong gamapanin tulad ng pagbibigay katarungan sa mga bilanggong nagdurusa ng walang kasalanan, bigyang paningin ang mga bulag, bigyang pandinig ang mga bingi, pagsalitaain ang mga pipi, palakarin ang mga pilay at pagalingin ang mga maysakit. Ngunit bakit sila po ang dapat bigyan ng atensyon? Ano po ba sila ng lipunan? Sila po ang mga taong pinagkakaitan ng lipunan. At ang misyon po ni Hesus ay ang misyon ng pagyakap sa mga ito. At ito rin po ang ating misyon bilang mananampalataya. Bagamat hindi po natin magagawa ang mga himala ni Hesus, maari naman po tayong maging tenga ng mga bingi, mata ng mga bulag, boses ng mga pipi, tinig ng mga inaapi at nanaghoy at sandalan ng mga pinagkaitan ng katarungan. Ngunit sino po ba sila sa ating tahanan, sa ating pamayanan at sa ating lipunan? Ikaw, ako, tayo ay may misyon hindi lamang po sa pakikinig ng salita ng Diyos ngunit higit sa lahat ay sa paghahayag nito. Ika nga po sa isang awiting pagbabasbas:

NAWA’Y MANATILING TAPAT SA DIWA NI HESUS
IHATID ANG MABUTING BALITA SA DUKHA
IPAHAYAG ANG KALAYAAN NG MGA BILANGO
IBALIK ANG PANINGIN NG BULAG
UPANG BIGYANG GINHAWA ANG MGA API
AT MAGHARI ANG KABUTIHANG-LOOB NG DIYOS

Ito rin po sana ang ating taglayin, ang maging daan ng kaharian ng Diyos dito sa lupa tulad ng paghahayag ni Hesus.